ፈጻሚት ቤት ጽሕፈት ሃገራዊ ባይቶ ንደሞክራስያዊ ለውጢ ድሕሪ ምዝዛም ካልኣይ ስሩዕ ኣኼብኡ ምስ ቀጸልቲ ኣኼባታት ኣቦ መንብራት ናይ’ተን ፈጽምቲ ሽማግለታት ጎኒ ንጎኒ ምስ’ዚ ኣኼባታት’ዚ ብኣባላት ፈጻሚት ቤት ጽሕፈት እዞም ዝስዕቡ ዕማማት ተሰላሲሎም ኣለዉ።

ሀ- ኤርትራዊ ሃገራዊ ባይቶ ንደሞክራስያዊ ለውጢ ከም ሓዲሽ ዝጣየስ ዘሎ ትካል መጠን ብሓሳብ ይኹን ብተመኩሮ በብግዜኡ ኣሰራርሕኡን ኣወዳድባኡን እናመዓራረየን ክኸይድ ስለዝግባእ ካልኣይ ስሩዕ ኣኼባ ፈ.ቤ.ጽ ኣብዚ መዳይ’ዚ ኣብ ሓጺር ናይ ሕሉፍ ተመክሮኡ ኣብ ውዳበኡን ኣሰራርሑን ሓድሓደ ግንዛበታት ክኽሰቱ ዝጸንሑ ይኹኑ ወይ ንቕድሚት ማዕቢሎም ክስረሓሎም ዘለዎም ኣሰራርሓታት ኣነጺሩ ብምቕማጥን ዘሕልፎም ኣገደስቲ ውሳኔታት ማእከል ገይሩ ናብ ኩሎም ዝምልከቶም ጽፍሕታቱ ክበጽሕ ገይሩ ይርከብ ኣሎ።

ለ- ድሕሪ ካልኣይ ስሩዕ ኣኼባ ፈ.ቤ.ጽ ኣብ ዝተፈላለዩ መዳያት ናይ ስራሕ ኣብ መጻኢ ክዕመሙ ናይ ዝወጹ መደባት ብግዜን ዓቕምን ፋይንሳዊ ትሕዝቶን ከመይነት ናይ ትግባረኦምን ብዝምልከት ብርክት ዝበሉ ካብኣቶም ድሕሪ ዓሚቕ ምይይጣት ጸፊፎም ክቐርቡ ተገይሮም ኣለዉ። ከምኡ’ውን ናይ ዝተፈላለዩ ክፍልታት ናይ ውሽጣዊ ኣሰራርሓ ቅጥዕታት ተጻፊፎም ንስራሕ ተዋዲዶም ይርከቡ።

ሀ- ድሕሪ ካልኣይ ስሩዕ ኣኼባ ፈ.ቤ.ጽ ንመድረኻዊ ዕማማት ኤ.ሃ.ባ.ደ.ለ ንምዕዋት ኣብ ዝምድናታት ክልቲኡ ህዝብታትን ሃገራትን ዞባናን ማእከል ዝገበረ ብዝተፈላለየ ጽፍሕታት ዝገልጽ ደንበ ተቓውሞ ኤርትራ ክሳብ ላዕለዎት ሰበ ስልጣናት ኢትዮጵያ ዝርከብዎም በብግዜኡ ሓበራዊ ርኽክባት ተኻይዶም። እዚ ክልተኣዊ ርኽክባት’ዚ ንንጥፈታት ባይቶ ናብ ዝሓሸ ብርኪ ንምስግጋሩ ዝሕግዝን ንዝምድናታት ክልቲኡ ህዝብታት ዘደልድል ምዃኑ ኣብ ግንዛበ ዝኣቱ እዩ።

ለ, ፈጻሚት ቤት ጽሕፈት ኣብ ዲፕሎማስያዊ መዳይ በቲ ኣቐዲሙ ምስ ኣገደስቲ ጸለውቲ ናይ ምዕራባውያን ሃገራትን ኣህጉራዊ ትካላትን ክገብሮ ዝጸንሐ ርኽክባት መበገሲ ብምግባር ምስ ፍሉጣት ናይ ዞባዊ ትካላት ማእከል ዝኾኑ ምዕራባውያን ዲፕሎማሲያዊ ኣካላት ኣብ ቤት ጽሕፈት ኤ.ሃ.ባ.ደ.ለ ዓሚቕ ሃናጽን ልዝባት ኣካይዱ። እዚ ሃናጺ ርክብ እዚ ንኤርትራዊ ሃገራዊ ባይቶ ንደሞክራስያዊ ለውጢ ኣብ ዞባዊ ጸለውቲ ትካላትን ዓለማዊ ምትእስሳራትን ኣብ ዘሰላሰሎ ዲፕሎማስያዊ ጻዕርታት ኣገዳሲ ሓጋዚ ረቋሒ ከም ዝኸውን ተገንዚቡ።

ሐ, ፈጻሚት ቤት ጽሕፈት ኤ.ሃ.ባ.ደ.ለ ኣብ ጅቡቲ ተኣሲሮም ንዝርከቡ ኤርትራውያን ጉዳዮም ንምፍታሕ ምስ ዝምልከቶም ኣካላት መንግስቲ እታ ሃገር ጽዑቕ ጻዕርታት ክገብር ዝጸንሐ ኮይኑ እንተኾነ ግና ኣብ መደምደምታ ከይበጽሐ ከሎ እዚ ሕጂ ተኽሰቱ ዝብሃል ዘሎ ተርእዮ ብደቂቕ እናተኻታተለ መዕለቢ ክርክብ ምስ ዝምልከቶም ኣካላት እታ ሃገርን ከባብን ጽዑቕ ጻዕርታት ኣብ ምግባር ይርከብ ኣሎ።

ንዜናዊ ዕማማትና ንምስላጥ ዘድሊ ዓቕሚ ሰብን መሳርሕታትን፡ ክካየዱ ዝጸንሑ ጻዕርታት ናብ ዝሓሸ ባይታ እናተሰጋገሩ ይመጹ ብምህላዎም ኣብ ቀረባ ኩሎም ዜናዊ ትካላት ብክርክርቡ ዝኽእሉ ዓቕምታትን መሳርሕታትን ክብገስ ይዋደድ ኣሎ።

ኤርትራዊ ሃገራዊ ባይቶ ንደሞክራስያዊ ለውጢ ንተበላሓታይ ዓቕሚ መንእሰያትና ንምልዕዓልን ኣብ ዝካየድ ዘሎ ደሞክራስያዊ ተጋድሎና ኣገዳሲ ተርኦም ክጻወቱን ምእንቲ በብግዜኡ ኣብ ኢትዮጵያ ክውደቡ ዝጸንሑ ሰሚናራት ናይ መንእሰያት እናተረኽበ መልእኽቱ ከመሓላልፍ ከም ዝጸንሐ ዝዝከር እዩ። ኣብ መጨረስታ ኣብ ደብረ ዘይት ኣብ ዝተጋብአ ሰሚናር እውን ዝለዓለ ልኡኽ ተረኺቡ መልእኽቱ ከም ዘመሓላለፈ ዝፍለጥ እዩ። ሕጂ እውን ኣብ ቀረባ ግዜ ኣብ ዝሰላሰል ናይ ተማህሮ መኣዲ ዘተ ምስ ስምረት መንእሰያት ኤርትራ ንድሕነት ሃገርን ኣብኡ ምስ ዝሳተፉ ዘለዉ ተምሃሮን ብሓባር ብምዃን ነቲ ዝጋበኣሉ ዘሎ መድረኽ ኣብ ምምራሕን ተወዲቦም ዕዙዝ ግደኦም ክጻወቱ ኣብ ምግባርን ዓቕሙ ብዝፈቐዶ ግደኡ ክጻወት ምዃኑ ተፈሊጡ ኣሎ። ኣብዚ ናይ ተምሃሮ መጋባእያ’ዚ እውን እንተኾነ እቲ መኣዲ ዘተ ብተጋድላይ ዶ/ዮሰፍ ብርሃኑ ኣቦ መንበር ፈጻሚት ቤት ጽሕፈት ኤ.ሃ.ባ.ደ.ለ ብዝቅረቡ ቃል ተኽፊቱ ስርሑ ጀሚሩ ይቅጽል ኣሎ።

ሽማግለ ዜናን ምልዕዓልን

ፈጻሚት ቤት ጽሕፈት

ኤርትራዊ ሃገራዊ ባይቶ ንደሞክራስያዊ ለውጢ

14 ነሓሰ 2012