ኤርትራዊ ሃገራዊ ኮምሽን ንደሞክራስያዊ ለውጢ

ካልአይ ስሩዕ አኬባ ጀሚሩ

ሎሚ’ውን ብርእሰ-ምትእምማን ሃገራዊ ጉባኤ ንምዕዋት ክንረባረብ ኢና!!  ኣብ ትሕቲ ዝብል ጭርሖ ካልኣይ ስሩዕ ኣኼባ ኤርትራዊ ሃገራዊ ኮምሽን ንደሞክራስያዊ ለውጢ ብ15 መጋቢት 2011 ሰዓት 8:30 ቅድሚ ቀትሪ ብወግዒ ተኸፊቱን ዕማማቱ ጀሚሩን።

ኣብ መኽፈቲ ኣኼባ ምክትል ኣቦ መንበር ኮምሽን ሓው ዓብደርሑማን ጣሃ ነቶም ካብ ዝተፈላለየ ኩርንዓት ዓለም ነዚ ኣኼባ’ዚ ንምዕዋት ዝመጹ 47 ኣባላት ኮምሽን እንቋዕ ብደሓን መጻእኩምን ገጽ ንገጽ ኣራኸበናን: ብተውሳኪ ከኣ ንቶም ኣባላት “ዘተን ደሞክራስን ይዓንብብ” ብዝብል መድረኻዊ ጭርሖ ዝተበገሰ ሸነኽ ሰልፊ ደሞክራሲ ህዝቢ ኤርትራ ሓው መ/ኑር ኣሕመድን፡ መኮንን ሃይለን ከም ኣባላት ኮምሽን ምጽንባሮም ዝተሰመዖ ሰናይ ትምኒቱ ብድሕሪ ምግላጽ፡ ምስ ኩሎም ኣሕዋቶም ኣባላት ኮምሽን ኮይኖም ነዚ ረዚን ህዝባዊ ሓደራ’ዚ ናብ ሽቶኡ ንምብጻሕ ልዑል ሓላፍነቶም ክጻወቱ ከምዝኽእሉ ከኣ ዘለዎ እምነት ገሊጹ።

ድሕሪ ምልኣተ ኣኼባ ምርጋግጽን፡ ምጽዳቅ ተሓዝቲ መዝገብን፡ ተርጎምትን፡ እቲ ኣኼባ ሕጋውነቱ ኣረጋጊጹ ኣብ ቀንዲ ኣጀንዳታቱ አተወ።

ቃል ፈጻሚ ኣካል ኮምሽን ብምክትል ኣቦ መንበር፡

ሓፈሻዊ ንሽድሽተ ወርሓዊ ጸብጻብ ፈጻሚ ኣካል፡

   ሀ. ጸብጻብ ፖሎቲካዊ ሽማግለ

            ለ. ጸብጻብ ሽማግለ ህዝባዊ ውደባ

            ሐ. ጸብጻብ ሽማግለ ዜናን ሓበሬታን

            መ. ጸብጻብ ሽማግለ ፋይናንስን ምምሕዳርን ቀሪቡ።

ኣባላት ኮምሽን ነዚኦም ኣብላዓሊ ተዘርዚሮም ዘለዉ ጸብጻባት ብህዱእ መንፈስን ዓቢ ሓላፍነትን ክግምጉሙ ዊዒሎም፡ እቲ ውዕሎ ናይ ቀዳምይ ማዓልቲ ተዛዚሙ፡ ካልኣይ ስሩዕ አኼባ ኮምሽን ጽባሕ ክቕጽል’ዩ።

ዓወት ንሃገራዊ ጉባኤ !!

ውድቀትን ንምልካዊ ስርዓት ህግደፍ!!

ሽማግለ ዜናን ሓበሬታን - ካብ ኣዳራሽ ኣኼባ

ኤርትራዊ ሃገራዊ ኮምሽን ንደሞክራስያዊ ለውጢ

15 መጋቢት 2011

www.encdc.com